വൈദ്യുതി ബോർഡിൽ നടന്നതും, നടക്കുന്നതും, നടക്കാൻ പോകുന്നതുമായ ഏതൊരു വിഷയത്തെക്കുറിച്ചും കൃത്യതയോട് കൂടി അഭിപ്രായം പറഞ്ഞ മറ്റൊരു പ്രസ്ഥാനം ഈ സ്ഥാപനത്തിൽ ഇല്ല. ശമ്പള പരിഷ്കരണ കരാറുകളുടെ സമയത്ത് ഓരോ കാറ്റഗറിയിലുമുള്ള തൊഴിലാളികളുടെ ഓരോ വിഷയങ്ങളിലും എത്ര കൃത്യതയോടെയാണ് വർക്കേഴ്സ് ഫെഡറേഷൻ നേതൃത്വം ഇടപെട്ടത് എന്ന് നമുക്ക് അനുഭവമുള്ളതാണ് ഓരോ ദീർഘകാല കരാറുകളിലും വർക്കേഴ്സ് ഫെഡറേഷൻ്റെ കയ്യൊപ്പുകൾ ഉണ്ടായിരുന്നു എന്നത് വസ്തുത തന്നെയാണ്. വളരെ ഖേദത്തോടെ തന്നെ പറയേണ്ടി വരുന്ന ഒരു വസ്തുത ഇടതുപക്ഷ ജനാധിപത്യമുന്നണി ഗവൺമെൻറ് അധികാരത്തിലിരിക്കുമ്പോൾ 2016 ലെയും 2021 ലെ ദീർഘകാല കരാറുകൾക്ക് സർക്കാർ അംഗീകാരം ലഭിച്ചിട്ടില്ല എന്നത് യാതൊരു തരത്തിലും നീതീകരിക്കാനാവുന്ന കാര്യമല്ല.ഉദ്യോഗസ്ഥ ദുഷ്പ്രഭുത്വത്തിന്റെ ഏറ്റവും അവസാനത്തെ ഉദാഹരണമായി ഇതിനെ കാണേണ്ടിവരും. ഇതിനെതിരായി ഒറ്റയ്ക്കും, കൂട്ടായും ശക്തമായ പ്രക്ഷോഭങ്ങൾ നടത്തുവാൻ വർക്കേഴ്സ് ഫെഡറേഷൻ മുൻപന്തിയിൽ തന്നെയാണ്.

സംസ്ഥാന വൈദ്യുതി മേഖലയിലെ കമ്പനി വൽക്കരണ കാലത്തെ ഫെഡറേഷൻ്റെ നിലപാടുകൾ ഇന്നും ചരിത്ര രേഖയായി നിലനിൽകുന്നു. കമ്പനി ഒന്നായാലും ഒൻപതായാലും കമ്പനി തന്നെയാണ് എന്നും, കമ്പനി വൽക്കരണം മൂലം ഉണ്ടാക്കാൻ പോകുന്ന വിപത്തുകളെ സംബന്ധിച്ചും ഏറ്റവും കൃത്യമായ നിലപാട് സ്വീകരിച്ച സംഘടനയാണ് ഫെഡറേഷൻ. സംയുക്ത പ്രക്ഷോഭങ്ങൾക്ക് നേതൃത്വം നൽകുകയും ചെയ്ത കേരള ഇലക്ട്രിസിറ്റി വർക്കേഴ്സ് ഫെഡറേഷൻ നിലപാടിൽ അല്പംപോലും വെള്ളം ചേർക്കാതെ മുന്നോട്ട് പോവുക തന്നെയായിരുന്നു. എന്നാൽ ഒപ്പം ഉണ്ടായിരുന്നവർ മറുകണ്ടം ചാടിയപ്പോഴും നിലപാടുകളിൽ ഉറച്ചുനിന്ന ഫെഡറേഷൻ എന്ന പ്രസ്ഥാനത്തിൻ്റെ മഹത്വം തന്നെയാണ്.

മാസ്റ്റർ ട്രസ്റ്റും, പെൻഷൻ ഫണ്ടും, ത്രികക്ഷി കരാറുമൊന്നും തൊഴിലാളികൾ മറന്നിട്ടില്ല. കേരളത്തിലെ പൊതുമേഖലാ സ്ഥാപനങ്ങളിലെ പെൻഷൻ പ്രായം അൻപത്തിയെട്ടും അറുപതും വയസായി ഇപ്പോഴും തുടരുമ്പോഴും വൈദ്യുതി ബോർഡിൽ മാത്രം പെൻഷൻ പ്രായം അൻപത്തിയാറ് വയസായി തുടരുന്നു. കോൺട്രിബ്യൂട്ടറി പെൻഷൻ വിഷയം പുനരാലോചിക്കുമെന്ന ഇടതുപക്ഷ ജനാധിപത്യമുന്നണി ഗവൺമെൻ്റിൻ്റെ വാഗ്ദാനം പാലിക്കണമെന്ന് ആവശ്യപ്പെട്ട് ഇന്നും സമര രംഗത്തുള്ള വൈദ്യുതി മേഖലയിലെ ഒരേ ഒരു പ്രസ്ഥാനം വർക്കേഴ്സ് ഫെഡറേഷൻ മാത്രമാണ്.

നിലവിൽ വൈദ്യുതി ബോർഡിൽ ഏറ്റവും അധികം പ്രതിസന്ധിയായി നില നിൽക്കുന്നത് തസ്തികകൾ ഒഴിഞ്ഞു കിടക്കുന്നതും ആവശ്യത്തിന് ജീവനക്കാരില്ലാത്തതും, ജീവനക്കാരുടെ പ്രമോഷനുകൾ തടയപ്പെട്ടിരിക്കുന്നതും, ക്ഷാമ ബത്ത ലീവ് സറണ്ടർ തുടങ്ങിയ ആനുകൂല്യ നിഷേധവും തന്നെയാണ്. വൈദ്യുതി ബോർഡിന്റെ ചരിത്രത്തിൽ തന്നെ അപൂർവ്വമായ സംഭവങ്ങളിൽ ഒന്നായി മാറിയിരിക്കുകയാണ് ഇലക്ട്രിസിറ്റി വർക്കർമാരിൽ നിന്ന് ലൈൻമാൻ ആയുള്ള പ്രമോഷൻ നൽകാതിരിക്കുന്ന സാഹചര്യം. ഒൻപത് വർഷത്തിലേറെയായി തൊഴിലാളി ആർജ്ജിച്ച അനുഭവജ്ഞാനത്തിനൊപ്പം ആവശ്യമായ ട്രെയിനിംഗുകളും നൽകി കഴിഞ്ഞു എങ്കിലും അർഹമായ പ്രമോഷനുകൾ ഇനിയും നൽകിയിട്ടില്ല എന്നത് അംഗീകരിക്കാനാവുന്നതല്ല. ഈ സ്ഥാപനത്തിൻ്റെ പുരോഗതിക്കായി രക്തവും വിയർപ്പും നൽകിയ തൊഴിലാളികളുടെ അസംതൃപ്തി തീർച്ചയായും സ്ഥാപനത്തിൻ്റെ തുടർന്നുള്ള പുരോഗതിക്ക് എതിരാകും. ഇലക്ട്രിസിറ്റി വർക്കർമാരുടെതിനു പുറമേ മറ്റെല്ലാ തസ്തികകളിലും ഇത്തരത്തിൽ പലവിധ കാരണങ്ങൾ പറഞ്ഞുകൊണ്ട് തൊഴിലാളികൾക്ക് അർഹമായ പ്രമോഷൻ അവസരങ്ങൾ നഷ്ടപ്പെടുത്തുന്നത് യാതൊരുതരത്തിലും ന്യായീകരിക്കാൻ കഴിയുന്ന കാര്യമല്ല.

ഇത്തരത്തിൽ ഉപഭോക്താക്കളെയും, തൊഴിലാളികളെയും, സ്ഥാപനത്തെയും, ബാധിക്കുന്ന വിഷയങ്ങളിൽ കൃത്യമായ നിലപാടുകൾ സ്വീകരിച്ചു കൊണ്ട് പ്രശ്ന പരിഹാരത്തിന് ശ്രമിക്കുന്ന സംഘടനയാണ് വർക്കേഴ്സ് ഫെഡറേഷൻ. നിരന്തരമായ പോരാട്ടങ്ങളിലൂടെ നേടിയെടുത്ത അവകാശങ്ങൾ നിലനിർത്താൻ സംഘടനയ്ക്ക് ആവും എന്നതിൽ യാതൊരു സംശയവുമില്ല. ഞങ്ങളുടെ മുൻഗാമികളായ സഖാക്കൾ കാട്ടി തന്ന പോരാട്ടങ്ങളുടെ പാതയിലൂടെ തന്നെ, അവർ പകർന്നു തന്ന ഊർജ്ജം ഉൾകൊണ്ട് തന്നെ മുന്നോട്ടു പോവുകയാണ്. അംഗീകാരത്തിൻ്റെ സാങ്കേതികത്വം നഷ്ടമായപ്പോഴും തൊഴിലാളികളുടെ നീറുന്ന പ്രശ്നങ്ങളിൽ നിരന്തരമായി ഇടപെടുന്ന പ്രസ്ഥാനം തൊഴിലാളികൾ പകർന്നു നൽകുന്ന ഊർജ്ജം കരുത്താക്കി മുന്നോട്ട് പോയി വിജയം കൈവരിക്കുക തന്നെ ചെയ്യുമെന്ന് ഉറപ്പു നൽകുകയാണ്